رحلة الحياة July 18, 2016 by st.mina multimedia لما كنت في المدرسة طلعونا رحلة وقبل الرحلة بيومين صاحبي كان عمال يجهز حاجات كتيرة سندوتشات وبيبسي وشيبسي ومايه وانا كنت دايما اتريق عليه واقوله يابني انت ليه هتشيل كل الحاجات دي فيه اختراع اسمه سوبر ماركت تشتري منه كل اللي انت عاوزه هناك المهم هو مسمعش كلامي وانا ركبت دماغي هو حضر كل حاجته اللي هياخدها معاه وانا حضرت فلوسي اللي هشتري بيها كل اللي انا عاوزه هناك واحنا رايحين مع بعض الاتوبيس هو ياعيني كان شايل شنط كتير اوي وتقيله وانا ماشي جنبه باشا حاطط ايدي في جيبي وبسمع اغاني كمان بيقولي شيل معايا شنطة وساعدنا قولتله ( هههههههههههه ) هو انا واخد فلوس علشان في الاخر اشيل !! المهم ركبنا الاتوبيس ووصلنا المكان اللي كنا رايحينه بس اتصدمت صدمت عمري لما ملقتش ولا سوبر ماركت في المكان اللي احنا رحناه عدت ساعه وعدت التانيه وانا بدأت اجوع ببص لصاحبي لقيته عمال ياكل رحت قولتله ماتجيب سندوتش .. قالي لا قولتله طيب خد الفلوس اللي انت عاوزها وهات سندوتش قالي بردو لا فضلت من غير اكل لحد مارجعنا البيت وفضلت فلوسي هي هي منقصتش جنيه ماهو للأسف لو الفلوس كانت بتتاكل كنت كلتها احنا كده بردو في حياتنا علي الارض الموت ده رحلة .. وكلنا هنروحها فيه ناس بتكنز فلوس قبل ماتروح الرحلة دي بس لما تسافر مش هيستمتعوا بجنيه واحد منها وفيه ناس بتقضي عمرها كله تجهز سندوتشاتها ( اعمالها الصالحه ) وجايز الموضوع بيكون تقيل شوية عليهم من حيث انهم مش بيفضوا انهم يستمتعوا بحلاوة الدنيا بس ثق وقت مانروح الرحله دي … هيدوقوا الحلاوة اللي بجد انا واحد من الناس بهتم كتير بشغلي وفلوسي وحياتي وتليفوني وعربيتي وحبيبتي وشقتي و و و و و و و …………… بس وقت ماروح الرحله دي ولا واحد منهم هينفعني بحاجه اعمالي الصالحة طريقي الوحيد لخلاص نفسي
