تداريب لنهاية السنة “عظة الثلاثاء 18/12/2014 لابينا الحبيب القمص ابونا داود لمعى
اخر ايام فى السنة زى اخر ايام العمر المفروض نعمل فيها حاجة:
1- انك تعترف … دى لوحدها وقفة مع النفس ليها قيمتها متكسلش عن سر الاعتراف لانة فى نعمة و انت محتاج تاخد زقة روحية لحياة روحية افضل ، نستعد لاستقبال سنة جديدة بالاعتراف.
2- شوف ايه التدريب وعدت ربنا تعمله طول السنة اللى فاتت و غالبا مكنتش امين فى وعدك زى مثلا:
– تدريب انك تصحى فى النصف الليل و لو نصف ساعة تصلى و تكلم ربنا.
– صلاه يسوع 100 مرة يجوز ابتديته و مكملتوش.
– زيارة مريض كل اسبوع – نعمل خير بشكل عملى مع واحد غير مسيحى.
– بقدر الامكان كخدام ميفوتش يوم من غير انجيل وياحبذا نصف ساعة.
حاول فى اخر 10 ايام تسترجع الحاجات دى انك نجحت فى التداريب دى قبل كده فدا يبقى حافز ليك انك تكمل.
3- لو شاطر تاخد ساعتين خلوة من هنا الى اخر السنة تراجع فيهم السنة كلها و لو شاطر تراجع العمر كله و لو كانت قعدة هادية جميلة هتفرق معاك كتير.
4- شوف مين زعلان منك و مدخلتش على سنة جديدة من غير ما تصلحه مهما كلفك من محايلة و انكسار لكرامتك متفضلش تقول بقى “هو اللى مبيعجبهوش ده ، هو اللى ابتدى انت اللى هتخسر.
5- ابتدى احضر تسبحة خصوصا اننا فى شهر كيهك ، جرب كده تاخد ليلة للصبح على الاقل ابقى عملت “اسهروا” دى مرة فى عمرى.
6- السنة راحت كلها من غير ما اقرا الانجيل كويس طب ما تحاول تطلعلك بمزمور جديد تحفظه فى العشر ايام دول و تردده على طول.
7- فى ناس بتيجى فى العشر ايام دول و تحاول تتناول كل يوم او يوم و يوم و تحاول تغسل عقلها و قلبها فى القداس مش على شكل العادة لكن كتقوى و توبة.
8- انا قصرت فى الخدمة اوى انا هذكر كل اسماء الخدام اللى معايا و كمان اسماء المخدومين واحد واحد باسمه.
9- اعتبر ان 31/12/2014 نهاية العالم طيب شوف بقى من هنا ل 31/12/2014 الساعة 12 هتعمل ايه ؟ ممكن ترن فى دماغك فكرة عمرك ما فكرت فيها او ربنا يحط فى قلبك شعور عمرك ما حسيت به قبل كده ، اخر 10 ايام فى عمرك هتاكل ازاى هتنام ازاى هتتكلم فى ايه.
10-لو واحد فيكم بيكتب خبرات او مذكرات ساعات بيبقى مناسب انك تفتح المذكرات دى و تقلب لو كانت تحضيرات او واجبات لخدمة اسال نفسك: انا عملت ايه من الكلام ده كله.
11-زى ما عايز تعلى فى الانجيل و الصلاه اعلى فى العطاء بدل 1/10 خليها ¼ و لا ال 1/2 كانك بتقول: هفضل يا اقطر عليك و اديك بالشح؟
12-ساعات شباب فى اخر 10 ايام يعمل مطانيات كتير او ينام على الارض او يصوم للغروب … نفسه يقدم ذبيحة حب لربنا ممثلة فى جهاد مكثف من قلب تائب.
13-ممكن يكون واحد اهمل فى قرائته الروحية و يقول فى اخر 10 ايام هجيب كتاب من كتب البابا زى كتاب الوداعة و التواضع او التوبة و النقاء و اذكره كويس علشان ادخل على السنة الجديدة و فكرة الكتاب دى شغلانى.
14-مع وجود السديهات و العظات ممكن الواحد يعمل مؤتمر لروحى تسمع له من 3 الى 4 عظات و تكتب و تقف بعد كل وعظة تصلى و ترنم تاخد جرعة مكثفة لنفسك.
15-تدريب “نظرة الى بيوتنا” لان بيكونوا اللى حوالينا تعبانين شوية او صعبان عليهم مننا من انشغالنا بالخدمة عنهم قول حقه عليا هملته بسبب الخدمة طيب خطرة و اهتم به و شجعه.
16-اصطاد 3 اشخاص للخدمة يستروا عليك قدام ربنا ، كتير من الناس بتتصلح حياتهم جوه الخدمة و بيبقوا لهيب نار و بيجيبوا ناس كتير لربنا يشفعوا لينا قدامه.
17-الخطايا المتكررة زى الادانة و القلق صلى كل يوم قول شيل عنى يا رب كذا و كذا كانك فى مرحلة خطيرة و عايز ربنا يشيل عنك قبل الهزيع الاخير.
– خد فكرة واحدة من دول و قول يا رب ساعدنى فى اخر 10 ايام دول علشان اعملها.
– و عندنا مفهوم مريح يسندنا هو اصحاب الساعة الحادية عشر ، يعنى ربنا قبل ناس تشتغل فى الاخر خاص بس اخدوها جد ، ربنا عنده طيبة متلقهاش عند حد ابدا: ده بتوع الساعة الاخيرة اداهم دينار زى اللى اشتغلوا اليوم كله قولوا يا رب عايز الحق الكام يوم الاخرانين دول علشان اقدمهم ليك.
– ربنا له المجد بيقبل مننا حاجات تبدو بسيطة و لكنها فى نظرة غالية زى ساكبة الطيب اللى راحت جابت الطيب الغالى ده و دلقته و محدش عجبه التصرف ده و اعتبروه تبزير لكن ربنا عجبه و قبله لدرجه انه يقول “حيثما يكرز بهذا الانجيل يبشر ايضا بما فعلته هذه المراه تذكارا لها” يعنى انت يا رب نقصك طيب يعنى هى و لا بشرت و لا استشهدت ؟ لكن علشان عملت حاجة طالعة من قلبها فعلا لربنا .
– اظن لو الواحد فينا فكر يقدم حاجة لربنا هيلاقى علشان ندخل لربنا بشكل افضل فى السنة الجديدة.
و لالهنا كل المجد و الكرامة من الان و الى الابد امين